O servizo móbil da Xunta para persoas retornadas estará en Xermade o 20 de agosto
O servizo gratuíto itinerante da Secretaría Xeral da Emigración da Xunta de Galicia desprazarase ata Xermade o mércores 20 de agosto para atender ás persoas retornadas. A unidade móbil estará situada na praza do Concello, onde ofrecerá información e orientación personalizada sobre distintos temas vinculados ao retorno a Galicia.
Este dispositivo móbil prestará apoio e asesoramento sobre cuestións administrativas tanto previas como posteriores ao regreso, así como sobre prestacións, subvencións e axudas públicas. Ademais, o persoal técnico informará sobre o acceso á asistencia sanitaria, posibilidades de formación, alternativas de vivenda e recursos de orientación laboral e emprego.
A iniciativa busca achegar os servizos da Xunta ao rural e facilitar a integración das persoas que regresan do exterior, ofrecéndolles canles directas para resolver dúbidas e realizar xestións de forma sinxela e próxima.