O SLG e Petón do Lobo celebran a paralización definitiva da mina de San Acisclo en Muras
O Sindicato Labrego Galego (SLG) e a Asociación Petón do Lobo celebran a resolución xudicial que pon fin de maneira definitiva ao proxecto mineiro de San Acisclo, promovido pola empresa Materiales Cerámicos Materias Primas SL no municipio de Muras. A Administración de Xustiza de Madrid non admitiu o recurso de casación presentado pola Xunta de Galicia e pola empresa promotora, confirmando así a sentenza do Tribunal Superior de Xustiza de Galicia que, en 2024, anulara a concesión outorgada pola Xunta.
As organizacións ecoloxistas e agrarias destacan que esta decisión “supón unha vitoria da veciñanza e dos colectivos que loitaron durante anos para frear un proxecto cheo de irregularidades e con graves impactos ambientais”. Margarida Prieto Ledo, coordinadora da loita contra o acaparamento de terras no SLG, asegurou que “a paralización é firme” e lembrou que o proxecto vulneraba directivas europeas de conservación de hábitats e da auga, ademais de situarse en plena Reserva da Biosfera Terras do Miño.
O Sindicato Labrego Galego e Petón do Lobo denuncian que, desde o inicio, a Administración galega “actuou de parte da empresa, ignorando informes técnicos e sociais”, e felicitan á veciñanza e ao Concello de Muras pola súa firme defensa do territorio.
A loita contra a mina comezou en 2020, cando o SLG pediu información sobre a concesión e advertiu das súas deficiencias. Posteriormente, distintos colectivos ecoloxistas, a Deputación de Lugo e mesmo o Comité Español do Programa MaB da UNESCO cuestionaron a falta de avaliación ambiental e a afección a espazos protexidos.
Para as entidades, esta decisión xudicial marca “un antes e un despois” na defensa do medio rural e do patrimonio natural galego. “Unha vez máis, tivo que ser a cidadanía quen fixese cumprir a legalidade fronte a un modelo que pretende explotar o territorio sen respecto nin planificación”, concluíu Prieto Ledo.