O teatro afeccionado chega a Meira este sábado

Xuntos en Camiño pon en escea a obra 'Atención ao Cliente' ás 18.30 horas

A casa da cultura de Meira será o escenario este sábado, 23 de novembro, da obra teatral Atención ao Cliente, unha comedia escrita e dirixida por Vanesa Ferreiro para o Grupo de Teatro de Antas de Ulla. A representación comezará ás 18:30 horas e a entrada é libre.

A obra, organizada pola asociación Xuntos en Camiño, conta cun elenco composto por actores e actrices afeccionados que dan vida a escenas cheas de humor e ironía arredor do mundo do consumo e as relacións co servizo de atención ao cliente.

Esta proposta forma parte do programa de actividades culturais impulsado coa colaboración da Deputación de Lugo e busca achegar o teatro á comunidade, promovendo o acceso a unha oferta cultural de calidade.