O Valadouro publica as ordenanzas de terrazas e limpeza de solares
O Concello do Valadouro vén de facer públicas dúas ordenanzas municipais, a reguradora da instalación de terrazas en espazos de uso público e a que rixe as normas de limpeza de terreos e solares en solo urbano, urbanizable e rustico
As dúas normas foron publicadas no BOP o pasado 26 de decembro polo que entrarán en vigor os 15 días da súa publicación. Ambas as dúas poden consultarse na web municipal na súa redacción final.
No que respecta á normativa das terrazas, trátase de establecer un marco normativo que regule o uso especial do dominio público municipal mediante a súa ocupación por particulares e que permita o desenvolvemento da actividade hostaleira da forma mais beneficiosa para os negocios e para o lecer e goce dos cidadáns, baixo a consideración do espazo público como un espazo de convivencia, que é de todos, e no que o uso e goce colectivo estean asegurados.
As terrazas que se atopen instaladas e autorizadas no momento da entrada en vigor da presente ordenanza poderán manterse nas mesmas condicións, se teñen autorización concedida, sempre que axusten a súa ocupación aos criterios técnicos e estéticos da nova normativa.
No caso de non estar adaptados outorgase quince meses de prórroga dende a publicación para adaptarse a ordenanza
LIMPEZA DE SOLARES
Esta segunda ordenanza ten natureza de ordenanza de policía urbana e rural e de prevención de incendios, non ligada a unhas directrices de planeamento concreto, por estar referida a aspectos de salubridade e seguridade.
O seu obxecto é a protección de salubridade pública, evitando situacións que supoñan risco para a saúde ou a integridade dos cidadáns.
Especifica que os solos deberán ser convenientemente rozados, limpados e xestionada a biomasa vexetal existente nos mesmos, conforme ao disposto no punto anterior, antes do día 1 de xuño de cada ano, debendo de mantelas rozadas ao longo de todo o período estival. Chegada esta data, o Concello poderá verificar o cumprimento da devandita obriga, procedendo a impoñer, en caso de incumprimento, as sancións oportunas de conformidade co establecido no réxime sancionador da presente ordenanza.
Establécense diferentes infaccións que levarían multas que oscilarían entre os 100 e os 3.000 euros.