O xacemento do Carreiro-Marzán en Foz comeza a amosar o patrimonio
Tras comezar as prospeccións arqueolóxicas do sitio arqueolóxico do Carreiro-Marzán atopáronse novas pezas do patrimonio focego, nesta ocasión foi un anaco de cerámica terra sigillata romana coas patas dun equino ou cérvido que podería datar o estrato arredor do século I.
Este xacemento que abarca tres penínsulas costeiras e no que existen restos murais e evidencias materiais da idade de Ferro e ao período romano contará cunha campaña que se prolongará durante dous meses, centrarase no treito do litoral comprendido entre as praias da Rapadoira e de Peizás co obxectivo de comprobar o actual estado das seccións do terreo nas que se documentaron estruturas e materiais arqueolóxico en anos anteriores, así como xeolocalizar as diferentes bocas e galerías mineiras existentes antes de que a erosión mariña elimine os rexistros que se conservan.
Nunha segunda fase, realizaranse dúas sondaxes arqueolóxicas valorativas co fin de caracterizar a cronoloxía dos restos neste sitio arqueolóxico. A actuación completarase con accións divulgativas para difundir os resultados obtidos e a posta en valor do xacemento arqueolóxico na comunidade local.
Cómpre lembrar que o treito de costa sobre o que se actuará está dominado por unha liña de cantís de forte pendente no que se inxiren pequenos entrantes en forma de cala e no que se documentaron varias aberturas e mesmo unha galería de explotación mineira feita con instrumentos metálicos. Neste espazo, aínda que non foron descubertos materiais arqueolóxicos que permitan determinar a cronoloxía destas minas, si se documentaron na superficie restos asociados a material arqueolóxico do período castrexo ou romano.
A actuación levada a cabo no concello de Foz enmárcase no proxecto de control xeométricos e monitorización de xacementos arqueolóxicos na Mariña lucense que iniciou a Consellería de Cultura e Educación, a través da Dirección Xeral de Patrimonio Cultural, no ano 2016 co obxectivo de avaliar os efectos da erosión costeira en diferentes sitios arqueolóxicos da comarca.
