Organizan en Pino un obradoiro de manualidades sobre os Reis Magos
A Asociación Recreativo Cultural de San Martiño de Pino organiza unha nova actividade dirixida a público familiar coa celebración dun taller de manualidades inspirado nos Reis Magos, que terá lugar o domingo 4 de xaneiro no local social da Escola de Pino.
Baixo o título Benvidos Reis Magos!, a proposta convida a desfrutar dunha mañá creativa e chea de maxia elaborando unha manualidade especial relacionada con estas datas tan sinaladas. O taller desenvolverase entre as 11.00 e as 12.00 horas e estará impartido por Noa Pena e Lucía Río, que guiarán ás persoas participantes durante toda a actividade.
A participación será gratuíta para as persoas socias da asociación, mentres que as non socias deberán aboar unha cota de 15 euros. Os materiais necesarios estarán incluídos no prezo. Desde a organización lembran que é imprescindible realizar inscrición previa, xa que as prazas son limitadas, e animan ás persoas interesadas a contactar coa asociación para obter máis información e formalizar a inscrición.
Esta iniciativa enmárcase dentro das actividades culturais e de lecer programadas pola asociación para dinamizar a vida social da parroquia durante o Nadal, fomentando a creatividade e a convivencia arredor dunha tradición tan querida como a dos Reis Magos.