Organizan senllas festas infantís en Castro de Rei e de Ribeiras de Lea polo Entroido
O Concello ten previsto, como todos os anos, actividades para a rapazada durante estas celebracións de Entroido.
Así, os pequenos terán o domingo 11 en Castro Ribeiras de Lea e o luns 12 en Castro de Rei as respectivas festas infantís con concurso de disfraces, merenda de Entroido, maquillaxe infantil, música, animación e bolsa de larpeiradas.
Estas celebracións, nas que haberá premios para as mellores parellas e grupos, ademais dos disfraces individuais mellor traballados, serán de 16.00 a 19.00 horas, na casa da cultura e no centro sociocultural Xosé Manuel Carballo, respectivamente.
Estas festas están abertas á rapazada entre os 0 e os 14 anos.
Para participar nesta actividade gratuíta será necesario entregar a correspondente ficha oficial nas oficinas do Concello antes do 6 de febreiro.