Organizan un obradoiro de risoterapia en Cospeito para a xestión emocional das persoas coidadoras
A Biblioteca Rural San Martiño de Pino, no Concello de Cospeito, será o escenario dun obradoiro gratuíto de risoterapia dirixido a toda a cidadanía, cun enfoque especial na xestión das emocións para persoas coidadoras.
A actividade terá lugar o vindeiro 23 de abril ás 16:30 horas e está organizada polo Concello de Cospeito en colaboración coa Asociación de Familiares de Enfermos de Alzheimer e Outras Demencias Neurodexenerativas de Lugo (AFALU).
Este obradoiro busca ofrecer ferramentas prácticas para mellorar o benestar emocional a través do humor e o sorriso, especialmente entre aquelas persoas que desempeñan labores de coidado, que adoitan estar sometidas a altos niveis de estrés e carga emocional.
A participación é aberta e gratuíta, e non se require inscrición previa, polo que se anima a todas as persoas interesadas a achegarse e participar nesta enriquecedora experiencia.