Organizan unha actividade de revisión de caixas refuxio dos morcegos
Coincidindo co Día Internacional das Reservas da Biosfera, a asociación Morcegos de Galicia organiza unha actividade especial de revisión de caixas refuxio nas Insuas do Miño, dentro do programa de seguemento das poboacións de morcegos nesta zona protexida. A actividade desenvolverase o domingo 3 de novembro, con saída desde a Casa das Insuas (Rábade) ás 16:00 horas, e está aberta ao público previa inscrición no correo info@morcegosdegalicia.org.
Como cada outono, os nóctulos grandes (Nyctalus lasiopterus), a meirande especie de morcegos de Europa, chegan ás insuas para aparearse. Os machos defenden refuxios aos que atraen as femias, formando pequenos haréns. Polo menos dous machos están a utilizar as caixas refuxio instaladas na zona, e xa foron observadas varias femias que se achegan a eles.
Grazas ao anelamento científico, comprobouse que tres das femias atopadas eran novas, mentres que outra femia e un dos machos xa foran identificados en anos anteriores. Estes datos achegan información moi valiosa sobre os movementos e o comportamento reprodutivo desta especie.
Este ano, o equipo de Morcegos de Galicia intensifica o seguemento do uso do bosque das Insuas do Miño por parte desta especie tan escasa e enigmática, dentro do acordo de custodia do territorio que a entidade mantén coa Deputación de Lugo para a xestión das Insuas do Miño e os Pozos do Ollo.
A actividade conta co apoio da Deputación de Lugo, a Reserva da Biosfera Terras do Miño e a UNESCO, e ten como obxectivo divulgar a importancia da conservación dos morcegos e dos espazos naturais que lles serven de refuxio.