Os dous equipos sénior do Vilalba FS progresan nos play off
O Grupo Forma-T Vilalba FS segue dando satisfaccións aos seus afeccionados. Esta fin de semana os dous equipos sénior trouxeron boas novas de cara aos play off. O masculino superou a primeira rolda de eliminatorias do ascenso a Segunda División Nacional logo de empatar en Benavente 2-2.
O equipo de Kini xa tiña un 7-4 da vantaxe do partido de ida, polo que o empate foi suficiente para pasar á seguinte fase, que tamén se fará en partido de ida e volta. Tócalle agora xogar co Vulcanizados Ruiz Tafa en Vilalba a próxima fin de semana.
Pola súa banda, o feminino logrou esta fin de semana clasificarse matematicamente para disputar os play off de ascenso a Primeira División. O equipo venceu 2-0 ao Rodiles na penúltima xornada e queda así situado entre los catro primeiros, pase o que pase na última sesión.
Con este resultado, volven facer historia ao lograr loitar polo ascenso no primeiro ano na Segunda División.