Os Xoves na Biblio das Pontes continúa este mes con contacontos e obradoiros
As Pontes continúa coa programación de Xoves na Biblio para o mes de marzo, unha iniciativa que busca fomentar a lectura e a creatividade entre os máis pequenos.
As actividades comezarán o xoves 6 de marzo ás 18:00 horas en Casa Dopeso cunha sesión titulada Neofalante, a cargo de Luis Vallecillo, dirixida a nenos e nenas a partir de 3 anos.
O xoves 13 de marzo, tamén ás 18:00 horas, Inma Soto presentará Xela, aventura na fraga na Biblioteca Municipal, un evento que require inscrición previa e está pensado para o público infantil a partir de 3 anos.
O día 20 de marzo ás 17:30 horas terá lugar o obradoiro de lettering Debuxar letras, impartido por Alba Farto na Biblioteca Municipal. Esta actividade está dirixida a nenos e nenas a partir de 6 anos e tamén precisa inscrición previa.
Por último, o xoves 27 de marzo ás 18:00 horas, Casa Dopeso acollerá Menú máxico de contos, unha sesión a cargo de Cris de Caldas para nenos e nenas a partir de 3 anos.
Esta programación cultural, promovida polo Concello das Pontes en colaboración coa Biblioteca Municipal, busca achegar a literatura e as artes aos máis pequenos a través de actividades dinámicas e participativas.