Os Xoves na Biblio das Pontes continúan con Sabela Gago
Continúa o programa Xoves na Biblio esta semana, 13 de maio, co espectáculo Maletas vaixeiras, de Sabela Gago, un espectáculo para nenos a partir de 4 anos.
Maletas de distintos tamaños e formas estimularán a imaxinación do público para guialo por países inventados e reais, fantásticos e universais. Mergullaranse no mar e pasearán por París ata chegar á muralla chinesa.
Fomentarán a lectura coa teatralización, nun constante xogo de interacción cos nenos e nenas e acompañarán á ratiña Sofía na súa viaxe polo Universo para descubrir quen é o ser mais poderoso do Mundo; terán que preguntarlle ó sol, á nube e ao vento, nun xogo de coreografías divertidas, para conducir avións, globos e naves espaciais.
E rematarán a viaxe coa maleta cheíña de sorpresas pois despois deste percorrido imaxinario terán unha nova maneira de ollar o Mundo.
A sesión será coma sempre, ás 18.00 horas na Casa Dopeso e de balde. Precisa inscrición previa no teléfono 982 102 562.
