Papá Noel estará na parroquia de Árbol, que o recibirá cunha chocolatada
Papá Noel visitará a parroquia de San Lorenzo o 21 de decembro nunha xornada festiva organizada pola Asociación Cultural e Deportiva de Árbol. O evento terá lugar na antiga escola do Santo e dará comezo a partir das 18.00 horas, cunha proposta pensada para reunir á veciñanza nun ambiente familiar e nadalicio.
Segundo informa a organización, durante a visita de Papá Noel ofrecerase chocolate quente con biscoito gratuíto para todas as persoas asistentes, co obxectivo de crear un espazo de encontro e convivencia arredor destas datas tan sinaladas. Desde a asociación animan á participación de nenos, nenas e maiores para compartir unha tarde de ilusión e celebración.
A xornada contará tamén cunha cita de carácter interno para a entidade. Ese mesmo día, ás 17.00 horas, está convocada unha Asemblea Xeral Extraordinaria da Asociación Cultural e Deportiva de Árbol, que se celebrará igualmente na escola do Santo. Na orde do día figura a renovación dos cargos da xunta directiva, incluíndo o cesamento dos actuais responsables, a presentación de candidaturas e a elección da nova directiva, así como o cobro das cotas correspondentes ao exercicio 2026.
Ademais, abordarase o traslado do domicilio social da asociación e a consecuente modificación dos estatutos, xunto con propostas de actividades a desenvolver e unha quenda final de rogos e preguntas.
A iniciativa conta coa colaboración da Deputación de Lugo e do Concello de Vilalba, e enmárcase dentro das actividades culturais e sociais que a asociación promove ao longo do ano para dinamizar a vida comunitaria da parroquia.