Pastoriza acolle unha xornada gratuíta sobre enerxías renovables nas granxas
Pastoriza acollerá este venres, 19 de decembro, unha xornada formativa gratuíta centrada no uso das enerxías renovables nas granxas de leite e carne, unha iniciativa dirixida a achegar alternativas sostibles e eficientes ao sector gandeiro.
A actividade desenvolverase na Casa da Cultura de Pastoriza en horario de mañá, de 11.00 a 14.00 horas, e tamén pola tarde, de 15.30 a 17.30 horas, co obxectivo de facilitar a asistencia do maior número posible de persoas interesadas. A formación estará impartida por Aitziber Uriagereka, especialista no ámbito das enerxías renovables aplicadas ao sector agrogandeiro.
A xornada está dirixida a persoas traballadoras, autónomas e desempregadas, e abordará as posibilidades de implantación de sistemas enerxéticos renovables nas explotacións gandeiras, tanto desde o punto de vista económico como ambiental, contribuíndo á redución de custos e á mellora da sustentabilidade das granxas.
A iniciativa está organizada polo Sindicato Labrego Galego, Comisións Labregas e a organización CIOAG, e conta cun financiamento do 100 % a través do programa de Formación Agroalimentaria, co apoio do Ministerio de Agricultura, Pesca e Alimentación e do Goberno de España.
As persoas interesadas poden inscribirse a través dos teléfonos 982 23 11 54 e 982 33 17 14, ou ben mediante o correo electrónico meira@sindicatalabrego.gal. A organización anima ao sector a participar nunha xornada pensada para ofrecer coñecementos prácticos e ferramentas útiles para o futuro das explotacións gandeiras.