Pedro Blanco salienta a transformación das Pontes coas axudas da Transición Xusta
![reunion de pedro blanco con cerceda e as pontes](https://terrachaxa.com/wp-content/uploads/2024/07/reunion-de-pedro-blanco-con-cerceda-e-as-pontes.jpg)
O delegado do Goberno en Galicia, Pedro Blanco, aproveitou a súa visita ao concello de Cerceda para poñer en valor a contribución dos 20 millóns de euros adxudicados dos Fondos de Transición Xusta á transformación das comarcas de Cerceda e As Pontes, afectadas polo feche das centrais térmicas.
O delegado informou de que o Instituto para a Transición Xusta, dependente do Ministerio para a Transición Ecolóxica e o Reto Demográfico, vén de conceder 8 millóns de euros para proxectos industriais en Galicia. “No caso de Cerceda, falamos de máis de 3 millóns para iniciativas relacionadas coa valorización de residuos, un ámbito no que xa é referente este concello, e a produción de biodiésel, entre outras”, apuntou. Pedro Blanco sinalou que estas axudas, que se suman aos 12 millóns para a mellora das infraestruturas sociais e dixitais dos concellos afectados polo feche das centrais térmicas, son unha mostra máis do compromiso do Goberno co emprego nestas comarcas “20 millóns en total que son unha aposta pola transformación do modelo produtivo por outro máis sustentable e respectuoso co medio ambiente e coa fixación de poboación no rural”.
O delegado, acompañado do alcalde de Cerceda, José Manuel Rodríguez, e da axente do territorio en convenios de Transición Xusta, Nuria Álvarez, visitou o Aquapark de Cerceda, unha das entidades que se benefician destes fondos. Xunto ao rexedor repasou tamén os investimentos do Goberno no concello, que superan os 25 millóns de euros. Neste senso, destacou os sete millóns de euros do ADIF para melloras nas estacións de Meirama (Cerceda), Uxes (Arteixo) y Ordes; os 1,8 millóns para a construción da Vía Verde ata Compostela, ou os 15 millóns para que Naturgy, Reganosa e Repsol levanten unha planta de hidróxeno verde nos terreos da antiga central térmica.
Neste senso, celebrou o anuncio, hoxe, do inicio da fase de información pública das bases reguladoras do concurso do nó de transición xusta de Meirama 220 kV, vinculado ao feche da central. O concurso ofrecerá 408 MW de capacidade de acceso a proxectos de renovables e almacenamento nos cinco concellos incluídos no Convenio de Transición Xusta (Carral, Cerceda, A Laracha, Ordes e Tordoia). Tamén lembrou que en abril incluíuse a construción da subestación de Maciñeira 400 kV, que concursará como nó de transición xusta na zona das Pontes, nas Modificacións Puntuais da Planificación 2021-2026.
“Son cartos e actuacións chamadas a transformar estas comarcas e a mellorar a calidade de vida dos veciños e veciñas de Cerceda”, indicou o delegado, que pediu á Xunta “a mesma axilidade para convocar axudas cos 111 millóns de euros que xestiona, dos que de momento aínda non adxudicou nin un só euro”.