Piden a cesión do salón de actos da Casa do Mar de Foz para a Escola de Música
![Captura de pantalla 2019 07 22 a las 12.03.09](https://terrachaxa.com/wp-content/uploads/2019/07/Captura-de-pantalla-2019-07-22-a-las-12.03.09.png)
En Foz, a Escola Municipal de Música é un centro cuxa matrícula non deixou de medrar a medida que foi ampliando os seus locais. O portavoz municipal do PP, Javier Castiñeira, anuncia que “o Partido Popular acaba de presentar unha moción de urxencia, para que se debata no Pleno que celebrará a corporación municipal o próximo xoves, para solicitar ao Instituto Social de la Marina, dependente do Goberno central, a cesión do salón de actos da Casa do Mar para seguir ampliando a Escola Municipal de Música Arcadio Mon”.
Castiñeira sinala: “O anterior goberno municipal fixo xestións moi importantes, que supuxeron un cambio substancial para a Escola de Música, como foi, primeiro, trasladar o centro dos sotos nos que estaba do colexio número 1 á Casa do Mar; o pouco tempo, solicitouse ao ISM a cesión dun local na primeira planta, de 70 metros cadrados, que tamén foi moi importante para seguir avanzando na ampliación da Escola de Música; recentemente a consellería de Política Social cedeu, grazas á colaboración da Asociación Virxe do Carme de Foz, o local da planta baixa, de 200 metros cadrados, onde estaba anteriormente o antigo bar da casa do Mar. Así ampliouse moito o espazo e servizos que pode dar a Escola Municipal de Música, o que supuxo un aumento da matrícula”.
O portavoz municipal do PP considera que “é necesario seguir ampliando a escola, porque así o demandan o equipo directivo e os pais, e así o fixeron ver na comisión de seguimento da escola”. Aclara que “a única posibilidade que hai agora é o salón de actos, que está na primeira planta, e que non se usa; sería moito máis útil ao servizo da Escola Municipal de Música. Deste xeito se podería completar en gran parte a transformación que iniciou o anterior goberno municipal”. Os populares esperan “que toda a corporación apoie esta proposta do PP para solicitar a cesión do salón de actos da Casa do Mar de Foz para a Escola Municipal de Música Arcadio Mon”.