Portos de Galicia garante que a dragaxe de Viveiro-Celeiro cumpre todos os protocolos
![118790435_1329332833939881_8524750083245611793_o](https://terrachaxa.com/wp-content/uploads/2020/09/118790435_1329332833939881_8524750083245611793_o-e1599553401915.jpg)
A alcaldesa de Viveiro, María Loureiro, púxose en contacto coa presidenta de Portos de Galicia para trasladarlle a preocupación da veciñanza polo inicio das obras de dragaxe dos Portos de Viveiro-Celeiro (Lugo), e as imaxes da draga vertendo material na praia de Covas.
Loureiro interesouse polos controis que neste sentido se están a seguir para a execución destas actuacións, asegurándose, por parte da Presidenta do ente autonómico, que se está cumprindo todos os protocolos e procedementos medio ambientais.
Ademais, a Técnica Municipal de Medio Ambiente achegouse ata a praia de Covas, lugar no que se iniciaron os traballos co dragaxe da canle de acceso e o verquido na praia.
Trátase dunha obra de gran magnitude, que conleva a tramitación dun expediente moi amplo, no que se inclúen autorizacións sectoriais e gran cantidade de analíticas de control medio ambiental previas.
O Concello de Viveiro tiña constancia de que o propio proxecto das obras inclúe un “Programa de vixiancia ambiental”, cun director de vixiancia ambiental e varios técnicos, no que se detallan pormenorizadamente todas as actuacións, controis, informes e analíticas que deben realizarse para levar a cabo o seguimento ambiental necesario, considerando, neste sentido, que se trata dun proxecto moi esixente no que se realiza unha avaliación pormemorizada antes, durante e despois das obras.
Neste senso, dende o Concello de Viveiro vanse intentar realizar as xestións oportunas co fin de solicitar que "se nos remitan os informes medioambientais que se emitan, por parte dos técnicos competentes, con respecto a este seguimento medioambiental", din.
O Concello de Viveiro non ten competencias con respecto á vixiancia ambiental desta obra, "pero é evidente que se trata dunha actuación que nos preocupa e con respecto á que seguirán a realizar as xestións de seguimento, como as realizadas no día de hoxe, de cara a constatar por parte da administración promotora o cumprimento dos parámetros establecidos no propio proxecto", remata Loureiro.