Adiada a presentación en Vilalba do libro 'Vidas e historias LGBT da Idade Media', de Carlos Callón
O Instituto de Estudos Chairegos, en colaboración co Concello de Vilalba, organiza a presentación do libro Vidas e historias LGBT da Idade Media, de Carlos Callón, publicado por Edicións Xerais. O evento terá lugar finalmente o martes 25 de marzo, ás 20:00 horas, na Casa da Cultura de Vilalba, despois de ser adiado. No acto intervirán o propio autor, Carlos Callón, e Marisa Barreiro.
Este ensaio analiza a evolución da diversidade LGBT ao longo da Idade Media, centrando a súa investigación na documentación galega e portuguesa, que achega unha perspectiva esencial dentro do contexto europeo. O libro rescata historias pouco coñecidas, como o matrimonio entre Pedro Díaz e Munio Vandílaz en 1061, considerado o primeiro entre homes rexistrado na Península Ibérica, ou as relacións entre Sancha Pérez e María Leve na Compostela do século XIII. Tamén aborda a existencia dun santoral LGBT na Galicia medieval e a censura de textos con contidos homosexuais en manuscritos da época.
Carlos Callón, profesor de Xeografía e Historia no Instituto Español de Lisboa e doutor en Estudos Lingüísticos e Literarios do Galego e do Portugués, conta cunha longa traxectoria investigadora e activista. Foi presidente de A Mesa pola Normalización Lingüística durante doce anos e é autor de obras destacadas sobre lingua galega e estudos LGBT.
A entrada ao evento será libre ata completar aforo.