Preto de 500 persoas participaron na Xuntanza de Maiores de Abadín
Este fin de semana Abadín acolleu unha nova edición da tradicional Xuntanza de Maiores 2025, que se celebrou no pavillón polideportivo da localidade e contou cunha participación extraordinaria de 470 persoas.
O encontro estivo marcado polo espírito de convivencia e irmandade. Durante o xantar, compartíronse conversas, reencontros, música e moito bo humor, converténdose os maiores nos verdadeiros protagonistas da xornada.
A tarde estivo amenizada por música en directo e pola actuación da coral, que puxo a nota cultural e emotiva ao evento. Esta celebración serviu para poñer en valor a importancia da comunidade, do respecto mutuo e da unión entre xeracións.
Desde o Concello de Abadín transmitiron o seu agradecemento ás persoas asistentes, ás colaboradoras e ao equipo organizador por facer posible un evento que xa se consolidou como unha cita destacada no calendario social do municipio.