Regresan a Friol a Festas de Santa Isabel cun amplo programa
O concello de Friol vivirá unha fin de semana moi especial coa celebración das festas na honra de Santa Isabel 2025, que terán lugar os días 12, 13 e 14 de xullo, cun completo programa de actividades que combinará tradición, animación musical e propostas para todas as idades.
A xornada do sábado comezará ás 12:00 horas coa concentración de coches antigos na Praza de España, organizada pola Asociación Lucense de Automóviles Antigos, unha cita xa consolidada que cada ano atrae a numerosos afeccionados do motor.
A continuación, terá lugar un pasarrúas con Xesta Verde de Friol, que animará as rúas e abrirá o ambiente festivo.
Durante o mediodía, a sesión vermú estará a cargo de Tania Veiras y Los Cumbiapop, grupo que tamén actuará pola noite na verbena, compartindo escenario con La Bamba, nunha noite que promete encher a Praza de ritmo e diversión para todas as xeracións.
O domingo comezará cun dos actos máis solemnes das festas: a misa solemne e procesión ás 13:00 horas, acompañada tamén por un pasarrúas a cargo de Los Españoles.
Durante a sesión vermú, volverá actuar Los Españoles, que tamén serán protagonistas na verbena nocturna, xunto ao espectáculo de Fania Blanco Show, un dúo artístico que animará a noite do domingo con música e espectáculo para toda a familia.
Un dos momentos destacados da tarde será o teatro familiar ás 18:30 horas no Parque de Rosalía, coa representación de Procúrase Pepa a Loba, unha obra de Cristina Collazo especialmente pensada para os máis pequenos, ofrecendo cultura e entretemento nun contorno natural.
As festas chegarán ao seu final o luns cunha nova misa solemne ás 13:00 horas, seguida dunha sesión vermú a cargo de Son de Festa, formación que tamén estará na verbena nocturna.
A partir das 23:30 horas, será a Orquestra Kubo a encargada de poñer o broche final a tres días de celebración, cun repertorio cheo de música actual e espectacularidade.
Desde a organización convidan a toda a veciñanza e visitantes a participar activamente destas festas que cada ano reforzan a identidade local, combinando raíces culturais, relixiosas e de lecer nun ambiente de convivencia e alegría. Santa Isabel 2025 promete ser unha edición inesquecible para todas as persoas que se acheguen a Friol nestas datas.