Remata a convivencia coa veciñanza da localidade bretoa de Lesneven
A concelleira de Cultura, Lorena Tenreiro, participou na viaxe da Irmandade As Pontes Lesneven que este ano levou aos nosos veciños e veciñas ata as terras bretonas.
Encontros institucionais, visita á Cidade das Telecomunicacións, paseos pola costa de granito rosa, xogos olímpicos na praia de Guisseny, paseos en bicicleta, sendeirismo por Île-de-Batz, paseos por lugares que nos recordan a nosa casa, tardes de praia, picnics en familia, xogos, verbenas bretonas foron algunhas das actividades que desenvolveron durante sete días intensos, convivindo coa veciñanza de Lesneven e sentindo de preto a súa cultura, os seus costumes, comprobando que son máis as cousas que os unen que as que os separan.
Balance positivo desta viaxe na que se destacaron as ceas compartidas, a gastronomía local, a queimada galega, música tradicional, bailes bretóns, risas, conversas e experiencias. O próximo ano será a veciñanza do país galo a que visite As Pontes.
