Rematadas as obras de mellora dos camiños municipais en Marraxón, Piñeiro, Porto do Liño e Terbá
O Concello das Pontes de García Rodríguez vén de concluír as obras de mellora dos camiños municipais situados nas parroquias da Faeira, Ribadeume, Espiñaredo e Santa María das Pontes, vías que funcionan como accesos principais aos núcleos de Marraxón, Piñeiro, Porto do Liño e Terbá.
A intervención contou cun investimento total de 122.802 euros, financiados a través do Plan Camiña Rural 2025-2026 da Axencia Galega de Desenvolvemento Rural, e permitiu modernizar uns viarios moi deteriorados polo paso do tempo e o uso continuado, garantindo unha comunicación máis segura e eficaz entre estas zonas rurais e as principais estradas autonómicas e provinciais do municipio.
Os traballos centráronse na rehabilitación integral da capa de rodaxe. Antes de estender o novo pavimento procedeuse á limpeza de marxes e cunetas, á retirada da vexetación que invadía a plataforma e á reparación de fochancas, afundimentos e deformacións existentes.
Tamén se executou o fresado do firme nos entronques para asegurar a correcta unión cos treitos lindeiros. No camiño que dá servizo ás áreas de Fraga dos Cregos e O Cameleiro reforzáronse os bordos mediante a execución dunha base de macadam, achegando maior estabilidade estrutural ao firme.
Posteriormente estendeuse unha nova capa de rodaxe con mestura bituminosa en quente, precedida dun rego de adherencia para mellorar a cohesión entre capas e aumentar a durabilidade do pavimento. A actuación completouse coa reposición da sinalización horizontal e vertical necesaria para incrementar a seguridade viaria.
Co remate destas obras, o Concello das Pontes reafirma o seu compromiso co mantemento e a modernización da rede viaria rural, contribuíndo a mellorar a mobilidade da veciñanza, a seguridade nos desprazamentos cotiáns e a conexión entre os distintos núcleos de poboación do termo municipal.