Renda anuncia en Corvelle a renovación de dúas vías
O tenente de alcalde e responsable de Infraestruturas Rurais, Modesto Renda, anunciou en Corvelle a mellora e renovación do vial de acceso ao núcleo de Pedras, así como a do vial que vai da Igrexa da parroquia á veciña Samarugo.
Dúas novas actuacións que o Concello levará a cabo na presente anualidade e que Renda quixo poñer en coñecemento dos veciños e veciñas pola vía dunha concorrida xuntanza, que lle permitíu escoitar as demandas dos presentes e fixar de común acordo coa veciñanza as diferentes obras para o 2024.
"Queremos gobernar escoitando e, entre outras, concretamos como seguinte prioridade mellorar o acceso ao barrio da Abelaira", explicou.
Renda, que agradeceu a grande afluencia de xente á reunión, lembrou a necesidade de investimentos que teñen as parroquias, pois, a mellora da rede viaria é unha cuestión central para os seus veciños e veciñas.