Representación teatral infantil en Guitiriz
A Casa Habanera de Guitiriz acollerá mañá venres, 10 de setembro, a representación da obra de teatro O vixilante dos soños. Este espectáculo será ás 19.30 horas no salón de actos.
O punto de partida da composición dramatúrxica do espectáculo é o conto O vixilante do soños publicado pola editorial Galaxia na colección Os duros.
Na historia sucédense os anos e Sonólicus, o protagonista, chega a deformar o seu corpo ao alongar os brazos a forza de estiralos cara á lúa. Na sociedade en xeral, moitos nenos e nenas deben enfrontarse á propia certeza de ser diferentes e loitar por esa diferenza.
Cando Sonólicus consigue o seu obxectivo acaba de transformar o seu corpo e acada un novo valor, transfórmase no vixilante dos soños e ten capacidade de axuda. Así, quen observe a escena confirmará que a autodeterminación persoal reflíctese positivamente no ben social.
A nai observa os cambios do fillo desde o desconcerto, o descoñecemento e a preocupación, pero desde o apoio. Sucede sen máis nesta historia, normalizando unha posición con respecto á diferenza. Esta normalidade implícita fai explícito para o público que así debe e pode ser en calquera caso da vida real.
