'Retratos' inaugúrase en Vilalba a mostra polo XXV aniversario do Iescha

A exposición reúne obras recentes de Pedro Cabarcos e poderá visitarse ata finais de decembro

O Instituto de Estudos Chairegos celebrará o seu vinte e cinco aniversario cunha proposta cultural que levará á Sala de Exposicións do Auditorio Municipal de Vilalba unha nova colección pictórica do artista local Pedro Cabarcos.

A mostra, titulada Retratos, reúne unha serie de cadros elaborados polo creador vilalbés e preséntase como un dos actos centrais da efeméride da entidade.

A apertura está programada para o próximo xoves 20 de novembro, ás oito da tarde, nun acto que terá lugar no propio Auditorio Municipal. A exposición permanecerá dispoñible para o público ata o 31 de decembro, dentro do horario habitual de funcionamento das instalacións.