Sae a licitación a obra de reforma do Santo Anxo de Rábade
![040719 Santo Anxo II](https://terrachaxa.com/wp-content/uploads/2019/07/040719-Santo-Anxo-II.jpg)
A Consellería de Política Social destina 301.857,99 euros para licitar as obras de mellora das instalacións do centro de menores Santo Anxo da Garda, emprazado na localidade luguesa de Rábade.
O delegado territorial da Xunta en Lugo, José Manuel Balseiro, explicou que os traballos centraranse na envolvente térmica do edificio e na mellora das instalacións interiores, incluídas as aulas e habitacións.
O obxectivo final é o de mellorar a condicións dos residentes, visitantes e persoal do centro, e tamén contribuír á modernización dunhas instalacións que datan do ano 1973 e que verán ampliada a súa eficiencia enerxética.
O prazo de execución da obra será de catro meses. As empresas interesas teñen ata o 24 de xullo para presentar as súas ofertas e poden consultar a documentación, pregos e características concretas no portal de contratos públicos de Galicia.
Descrición dos traballos
A obra proxectada inclúe a mellora xeral do sistema de illamento térmico do edificio, actuando sobre a totalidade do mesmo: fachadas, cuberta e carpintería exterior. A mellora da eficiencia enerxética trae aparellada a redución de gasto para manter o inmoble a unha temperatura óptima, co consecuente beneficio para o medio ambiente.
Procederase tamén a substitución do sistema de evacuación de augas pluviais (canlóns e baixantes) que serán agora de aceiro lacado e ao cambio de fiestras e portas, que serán de aluminio, para garantir un máis axeitado pechamento térmico.
Polo que respecta ao interior do edificio, os traballos prevén a renovación dos baños existentes no primeiro andar, incluída a substitución das pezas sanitarias que sexan precisas. Prevese tamén incorporar un aseo adaptado a persoas con mobilidade reducida.
No resto do inmoble completarase a mellora da accesibilidade das instalacións coa construción dunha rampla de acceso e a substitución da varanda existente na escaleira por outra nova.
Centro de menores
O centro de menores Santo Anxo da Garda, é unha instalación residencial de protección de menores, de titularidade e xestión pública, coa tipoloxía de centro de reeducación, no que se presta acollemento residencial a persoas menores de idade que se atopan baixo a garda ou a tutela da administración pública, por proceder dunha situación de risco ou de desamparo no seu núcleo familiar.
Os usuarios deste centro son mozos e mozas de 14 anos ou máis, que requiren dunha intervención especializada por presentar problemas de conduta que desaconsellan a súa convivencia con nenos e nenas máis pequenos noutros centros residenciais. Estes rapaces e rapazas son obxecto dun tratamento educativo individualizado que ten en conta as súas circunstancias persoais e socio familiares.