San Xiao de Mos presume de galiña autóctona
![Exemplar de galo de Mos.](https://terrachaxa.com/wp-content/uploads/2017/10/Exemplar-de-galo-de-Mos..jpg)
Os sete criadores de galiña de Mos da parroquia orixinaria desta raza autóctona, San Xiao de Mos, xa teñen dispoñibles os 200 polos que crían específicamente para a súa degustación na feira que celebran cada ano o último domingo de outubro a modo de “reivindicación da orixe da raza”.
Da man destes criadores, que non se dedican á comercialización da carne ou dos ovos da raza, nacía esta iniciativa. E este ano alcanza a oitava edición ofrecendo, ademais da degustación da carne desta ave o domingo 29 de outubro, artesanía e exposición de maquinaria agrícola, xogos populares da man do Cadaval e animación a cargo dun dúo musical.
Ao longo da mañá cociñarase o polo no propio escenario da feira onde, ao mediodía, se servirán 800 racións, 50 máis que o ano pasado. “Noutras ocasións chegamos a despachar 1.000 racións, pero este ano dispoñemos de menos carne”, como indica un dos criadores, Carlos Silvosa. O menú consta de polo guisado con patacas asadas, bebida, tarta de Santiago e queixo de Leitigal e terá un prezo de 8 euros. “As entradas poderanse adquirir dende dúas semanas antes nos establecementos de Castro, contactando cos criadores ou o mesmo día da feira”.
Exposición e concurso de Avimós
A Asociación de Avicultores da Raza Galiña de Mos (Avimós) achegará exemplares da raza para a súa exposición; pero a presenza destas aves tamén terá protagonismo co concurso comarcal de Avimós que premiará aos mellores exemplares.
Tamén participarán na feira outros criadores da asociación que achegarán, para a súa venda, ovos ou exemplares desta rústica raza de plumaxe brillante e abundante.