Santa Mariña abrirá as súas festas cunha liscada este venres
A parroquia de Santa Mariña, en Guitiriz, vivirá esta fin de semana unhas das súas festas grandes, cun completo programa que combina tradición relixiosa, gastronomía e música en directo, converténdose nunha cita imprescindible para veciñanza e visitantes.
As celebracións comezan hoxe venres, a partir das 22:00 horas, cunha degustación gratuíta de liscos e chourizos, servidos polo Bar Porto, seguida dunha verbena amenizada polo Dúo Venus.
O sábado 12 será o día grande. A misa solemne celebrarase ás 13:30 horas, cantada pola recoñecida Coral de Bravío, da Coruña. Ao remate, a sesión vermú estará a cargo da Orquestra Alianza, que tamén será protagonista pola noite, compartindo escenario co DJ Casanova nunha verbena que promete estender a festa ata altas horas.
As festas pecharán o domingo 13 de xullo cunha nova misa solemne ás 13:30 horas, seguida de sesión vermú e verbena coa animación da orquestra Trébol, poñendo o broche final a tres días de celebracións intensas.