Teatro este venres en Rábade co grupo de teatro do concello
Este venres 27 de xuño ás 20:30 horas, o Centro Sociocultural de Rábade acollerá a estrea da obra de teatro Bon será, a cargo do Grupo de Teatro do Concello de Rábade, correspondente á tempada 2024/2025.
A montaxe, dirixida por Marga Portomeñe, reúne sobre as táboas a un elenco composto por Teresa Carral, Inés Losada, Digna López, Anselmo Pérez, Manola Carral, Lina Álvarez, Ángel Díaz, Suso Fernández e Pilar Álvarez. A obra está estruturada en catro pequenas historias: A galería de arte, Unha de grelos, Tenda de ultramarinos e Atraco en directo.
Trátase dun dos eventos culturais máis esperados do ano en Rábade, xa que o grupo de teatro local leva preto de dúas décadas en activo, sendo un referente de participación e dinamización veciñal. A cita promete risas, emocións e, sobre todo, un recoñecemento ao talento escénico da comunidade.