Triplo empate por equipos no III Aberto das freces de billarda
![Billarda III ABERTO DAS FRECES 1](https://terrachaxa.com/wp-content/uploads/2022/04/Billarda-III-ABERTO-DAS-FRECES-1.jpg)
Por Daniel Rodríguez Saavedra.
Pode decirse con seguridade que Bretoña foi xerme para que un puñado de arroutados levaran adiante a creación da LNB. Un pequeno proxecto que hoxe en día segue acadando cotas de participación que daquela naide se atrevía a imaxinar.
Logo dunhos anos de ausencia, as billardas volveron voar ledas cruzando os azuis ceos da anterga Britonia no III Aberto das Freces, sendo a oitava xornada da liga.
No campo da festa e nunha tarde de sol expléndida, acudiron a chamada das gorentosas freces (cas que a organización agasallou os participantes ao remate do aberto), setenta e un palanadores (48 homes, 15 donas e 8 cativos).
O chan por mor das pasadas choivas mantíñase algo mal por zonas e noutras o musgo facía traballoso asentar ben as billardas o que se traduxo en puntuacións non demasiado altas. Só sete palanadores acadaron ou superaron os vinte puntos. Entre estos ousados están os gañadores da xornada. Charli de Carabullo gañou o desempate a Xan Bagaria de Madia Leva (os dous con 23 puntos) e terceiro con 22 puntos, Muriego de Remourelle Bulls .
En donas luciuse Milagros de Carabullo, que estrea podio, seguírona Dori e Aroa, compañeiras de Billardeiros Musicais. Mateu de Madia Leva, dominou a categoría infantil e nada menos que con 20 puntos, tras del clasificáronse Aroa e Diego.
En equipos por primeira vez deuse un triple empate na cabeza o que dí ben as claras a igualdade que reina entre os tres primeiros da clasificación. Tocoulle gañar a Carabullo dado que un dos seus xogadores, Charli, foi quen acadou a maior puntuación e así o establece o regulamento de xogo.
Co triunfo en Bretoña, Charli deu un salto do quinto ao primeiro posto da clasificación xeral, na que os cinco primeiros seguen a se intercambiar os postos constantemente. Quedan tan so dúas xornadas para rematar a tempada e so a categoría de donas e a de infantís semellan estar case decididas. Agárdanos un final de tempada de infarto.
Rematouse a xornada ca entrega de agasallos os gañadores e ca proba por tódolos pesentes das típicas lamboadas da zona, as freces acompañados da música de gaitas.
A vindeira xornada será na Ponte de Outeiro e xogarase o sábado 16 no campo de fútbol de Muimenta.
As clasificacións logo da oitaba xornada quedan asi:
Individual:
Charli (Carabullo) 150 p.
Basilio (Billardeiros Musicais) 149 p.
Daniel (Billardeiros Musicais) 149 p.
Regueiro (Troitas Bravas) 148 p.
Sachas (Troitas Bravas) 147 p.
Donas:
Aroa (Billardeiros Musicais) 107 p.
Irea (Carabullo) 91 p.
Geni (Billardeiros Musicais) 71 p.
Equipos:
Carabullo (Ponte de Outeiro) 613 p.
Troitas Bravas (A Pontenova) 610 p.
Billardeiros Musicais (Ribadeo) 604 p.
CALENDARIO
- 1ª xornada – Castroverde – domingo 12 de setembro – organiza Billarda Verde
- 2ª xornada – A Pontenova – domingo 3 de outubro – organiza Troitas Bravas
- 3ª xornada – Lugo – domingo 14 de novembro – organiza Madia Leva
- FÓRA DE LIGA: Copa Cantábrica entre Galicia e Asturias – Piedras Blancas – sábado 20 de novembro ADIADA
- 4ª xornada – Ribadeo – domingo 12 de decembro – organiza Billardeiros Musicais
- 5ª xornada – Castro Ribeiras de Lea – sábado 15 de xaneiro – organiza Chainzos Cadaval
- 6ª xornada – Mondoñedo – sábado 12 de febreiro
- 7ª xornada – San Miguel – sábado 5 de marzo – organiza Flores
- 8ª xornada – Begonte – domingo 20 de abril – organiza Castiñeiro Milenario
- FÓRA DE LIGA: XII O Varal encontro billardeiro entre as tres conferencias
- 9ª xornada – Ponte de Outeiro – sábado 16 de abril – organiza Carabullo
- 10ª xornada – Remourelle – sábado 14 de maio – organiza Remourelle Bulls
- Finais en Santiago de Compostela – domingo 29 de maio