Ultiman as obras da nova Oficina de Emprego de Vilalba
A Consellería de Emprego, Comercio e Emigración está a ultimar as obras da nova oficina de emprego de Vilalba, que contan cun investimento de máis de 756.000 euros.
O delegado territorial da Xunta en Lugo, Javier Arias, comprobou a marcha dos traballos, que se prevé rematar nas próximas semanas para poder incorporar despois o mobiliario e equipamento necesarios. Estímase que o traslado efectivo do servizo poida producirse a principios do vindeiro ano.
A oficina estará situada na rúa das Pedreiras, ocupando dous locais de titularidade autonómica que pertencían ao Instituto Galego da Vivenda e Solo e suman preto de 460 metros cadrados. Non tiveran actividade comercial ou de outro tipo con anterioridade, polo que foi necesario abordar a execución integral de instalacións e subministros.
A nova oficina será máis moderna, eficiente e confortable para as persoas traballadoras e usuarias. Contará con máis espazo para as novas incorporacións de persoal así como con sala de reunións, despacho para orientación laboral, zona de espera, arquivo, almacén ou aseos.