Un 300 atletas participarán na Carreira Pedestre de San Xosé este domingo
![carreira san xose as pontes](https://terrachaxa.com/wp-content/uploads/2023/03/carreira-san-xose-as-pontes.jpg)
Máis de 300 atletas, procedentes de toda Galicia, participarán o domingo, 19 de marzo, na XXX Carreira Pedestre de San Xosé, unha proba organizada polo Concello das Pontes en colaboración coa Federación Galega de Atletismo e que se realizará de forma conxunta co Campionato Galego 5k en ruta.
A proba, incluída no calendario oficial das competicións da FGA e que discorrerá por nun circuíto urbano homologado, comezará ás 11:00 da mañá coas categorías escolares que terán que correr, 75 metros no caso da sub categoría biberón mentres que as categorías sub 8, sub 10, sub 12, sub 14 e sub 16 deberán dar entre unha e catro voltas a un circuíto, pechado ao tráfico, duns 430 metros, aproximadamente, que transcorrerá entre a Rúa 8 de Marzo e a Rúa A Xanela.
As categorías absolutas (sub 18, sénior, máster 35, máster 45 e máster 55) tomarán a saída ás 12:00 hora para recorrer un trazado de cinco quilómetros que pasará, entre outras, pola Rúa 8 de marzo, Sergio Rivera Chao, Avenida de Galicia, Avenida da Habana, e a Rúa Celso Emilio Ferreiro para regresar á Rúa 8 de marzo.
Todas as persoas participantes na categoría biberón recibirán unha medalla e haberá medalla para os tres primeiros clasificados (masculino e feminino) das restantes categorías escolares.
No caso das categorías absolutas haberá premios metálicos (300, 200 e 100 euros) para os tres primerios clasificados da clasificación xeral absoluta (masculino e feminino) e recibirán un trofeo deseñado pola Asociación Amigos da Madeira das Pontes mentres que os tres primeiros clasificados de cada unha das categorías que integran a categoría absoluta recibirán unha medalla.
Haberá tamén un premio ao mellor pontes e a mellor pontesa consistente nunha cesta de produtos locais así como unha medalla.
Desde o Concello das Pontes animan a veciñanza a sumarse a esta gran festa do deporte, e acompañar aos atletas ao longo de todo o percorrido e lembran que o sábado 18 de marzo, desde ás 22:00 horas hasta o domingo, 19 de marzo, ás 14:00 horas permanecerán pechadas ao tráfico a Rúa A Xanela e a Rúa 8 de marzo, entre a intersección coa Rúa Rego do Campo e a Rúa A Xanela.
CAMPIONATO GALEGO
No campionato galego están inscritos 170 deportistas, destacando a presenza de varios dos campións autonómicos. Entre eles, os e as que aspiran a revalidar o título é a campioa galega absoluta Tina Fernández, do Atletismo Sar, e Víctor Xosé González, de Comesaña da M35, Emilio García da SD Compostela na M45, Iago Pereira da Ximnástica na absoluta e Carolina Santos, do Ría de Ferrol, na Sub18.
Entre atletas internacionais estará Uxía Pérez, o Atletismo Feminino Celta, e Sandra Mosquera, do Comesaña. Tamén estará nas Pontes o campión galego dos 1.500 metros en pista cuberta, Pablo Bocelo da Ximnástica, e o medallista de bronce, Jorge Puig, do Atletismo Santiago. Pechan as participacións destacadas Ricardo Negrete do Atletismo Ferrol, Iván Rego do Lucus e Alejandra Formoso na Triki Team, ademais de Zelinda Spencer, Inés Papín, Soledad Castro, Xosé Luís Otero e Elvira Tresguerras.
![carreira pedestre san xose](https://terrachaxa.com/wp-content/uploads/thumbs/2023/03/carreira-pedestre-san-xose-200x282.jpg)