Un cociñeiro italiano experto na elaboración de pizzas imparte formación no IES de Foz
O pizzaiolo (cociñeiro experto na elaboración de pizzas) Franco López, representante do Movimento Pizzaioli Italiani, na rexión de Basilicata, está esta semana no IES de Foz para impartir formación relacionada coa elaboración de pizzas.
Desde o IES de Foz destacan que “durante estes días Franco López explica aos alumnos os segredos da elaboración da masa, a elección da fariña, o lévedo máis idóneo e o proceso de fermentación. Como actividades especiais contamos cunha carta degustación hoxe, martes, ás 14:30 horas no comedor de carta do IES, onde se elaboran cinco pizzas salgadas e dúas doces. O mércores 27 os alumnos que comen no comedor escolar poderán gozar de dúas sobremesas moi especiais: pizza Nutella e pizza de froitas. Ese mesmo día pola tarde, ás 17:30 horas, impartirá formación ao grupo de adultos e a profesionais da Mariña. O xoves 28 ofrecerase pizza Margarita aos estudantes que comen no centro, elaborada polos alumnos de Hostalería”.
Durante a súa estancia en Foz Franco López está aproveitando para coñecer A Coruña, Santiago e os lugares máis emblemáticos da Mariña luguesa.