Unha empresa catalá investirá máis de 20 millóns en Friol nun centro de incubación de ovos
O grupo catalán Vall Companys anunciou a construción dun moderno Centro de Procesado de Primeira Transformación para a incubación de ovos no concello de Friol. O proxecto, que supón un investimento inicial de algo máis de vinte millóns de euros, ten como obxectivo impulsar o desenvolvemento industrial e económico do municipio e da súa contorna.
As instalacións levantaranse nunha parcela de 75.921 metros cadrados e contarán cunha superficie construída de 12.597,74 metros cadrados destinada á incubación. O centro estará dotado con tecnoloxía de vangarda que permitirá acadar unha capacidade de produción de ata 1,5 millóns de ovos por semana, o que se traduce en 62,4 millóns de pollos ao ano.
Na súa primeira fase, o proxecto prevé a creación de 22 empregos directos e 10 indirectos, ofrecendo novas oportunidades laborais tanto para a poboación local como para a das zonas próximas. Ademais, a posta en marcha deste centro permitirá internalizar o proceso de incubación, optimizando a cadea de subministración, reforzando o control de calidade e reducindo os tempos de distribución, co que se garantirán produtos máis frescos e seguros para os consumidores.
Desde Vall Companys destacaron o papel fundamental do Concello de Friol e do seu alcalde no desenvolvemento desta iniciativa. “Sorprendeunos gratamente o acompañamento do alcalde e o seu asesoramento na tramitación do proxecto, ao que lle estamos eternamente agradecidos. O seu apoio incondicional e a axilidade administrativa foron determinantes para que este centro sexa hoxe unha realidade no municipio de Friol”, subliñaron desde a compañía.
Con este investimento, Vall Companys non só reforza a súa posición de liderado no sector avícola, senón que tamén reafirma o seu compromiso coa innovación tecnolóxica, a sustentabilidade ambiental e o desenvolvemento económico de Galicia.