Veciños de Sancovade organizan os concursos de decoración de Nadal
A asociación veciñal de Sancovade vén de publicar as bases dos seus concursos de Nadal, unha iniciativa que busca fomentar o espírito destas datas, impulsar a creatividade e promover a participación da veciñanza na decoración da casa escola e das vivendas da parroquia. Poderá participar calquera persoa ou familia de Sancovade, e a inscrición é totalmente gratuíta.
Establécense dúas categorías: mellor adorno e mellor casa dentro do certame “Ilumina Sancovade”. As inscricións para o concurso de adornos deberán formalizarse antes do 9 de decembro, entregando a proposta a algún membro da asociación, depositándoa no buzón da escola ou presentándoa os luns e martes de 18.00 a 19.00 horas, ou os xoves de 20.00 a 21.30 horas. No caso do concurso de casas, o prazo remata o 20 de decembro e será necesario enviar unha fotografía tipo colaxe da vivenda decorada —interior ou exterior— a través de correo electrónico, WhatsApp ou Messenger.
Os adornos deberán estar elaborados de maneira artesanal, seguindo o lema “made in na casa”. O xurado estará composto por membros de Árdelle o Eixo sen lazos na parroquia, que seleccionarán tres finalistas atendendo á creatividade, harmonía, estética e orixinalidade, ademais da acollida nas publicacións da asociación en Facebook.
A visita do xurado ás casas clasificadas terá lugar entre o 22 e o 26 de decembro. Nesas datas tamén se decidirá o mellor adorno da casa escola. O resultado final farase público antes do 30 de decembro nas redes sociais da asociación, e os gañadores recibirán un agasallo de Nadal.