Vilalba aberta demanda ao Concello que asuma a xestión da piscina
A asemblea de Vilalba Aberta vén de facer público o seu posicionamento ao respecto da saída a concurso do servizo da Piscina e o Parque Acuático para os próximos catro anos. Un debate, previsto na orde do día do Pleno Ordinario do vindeiro luns e no que a formación asemblearia defenderá o inmediato control municipal de ámbolos servizos coma paso previo á súa definitiva remunicipalización.
Na súa argumentación, fan referencia aos sobrecustes inherentes a toda adxudicación e "ás posibilidades que para as arcas municipais suporían o aforro nas porcentaxes referidas á cota de beneficios industriais que ata o de agora se reservaba a empresa, das comisións comerciais así coma no que ten que ver co pagamento do correspondente IVE, a realizar con cada factura remitida, e que dende Vilalba Aberta cifran nun extra de 56.016,01€ en base ao explicitado no orzamento máximo de licitación".
A este respecto e segundo os estudos realizados desde a Federación Española de Municipios e Provincias, "o aforro mínimo que se produciría pola remunicipalización do servizo estaría en torno ao 30% e sería seguramente superior, como demostran algunhas experiencias de Concellos que retomaron o control directo de servizos das memas carácterísticas no que vai de lexislatura", din.
Na mesma liña se pronunciaba o seu voceiro e edil, Modesto Renda, quen apelou á responsabilidade do Goberno Municipal, subliñando "a importancia de optimizar recursos e capital humano na súa defensa dun modelo de xestión pública que, ao tempo que aseguraría que o obxecto da prestación se reduza en exclusiva ao que ten que ver coa calidade do servizo, blindaría a estabilidade nas condicións e dereitos duns traballadores/as vítimas, tamén, do proceder en materia laboral das dúas últimas adxudicatarias".