Vilalba Aberta reúnese coa veciñanza de San Simón este xoves
Vilalba Aberta prosigue este xoves súa iniciativa Rede de Parroquias. Retomada o mes pasado en Belesar logo de ser aprazada polo impacto da sexta onda da Covid, trátase dunha serie de encontros “parroquia a parroquia” deseñados pola formación co obxectivo de coñecer de primeira man as necesidades da veciñanza do rural e incorporalas, logo, á axenda política da corporación.
Así, e despois das sete primeiras de Santaballa e Nete, Ladra, Oleiros, Carballido e Corbelle e Belesar a formación municipalista visitará San Simón co fin de celebrar a que será a oitava parada da concorrida xeira.
“Dende Vilalba Aberta queremos dar resposta ao que tantos veciños das parroquias nos dixeron semanas antes da celebración das Eleccións Municipais: As reunións nas parroquias, durante os catro anos e non só en campaña electoral”, explicou a súa responsable de organización, Mónica González.
Á xuntanza, fixada para este xoves día 28 ás 20:30h na antiga escola da Pedragosa, seguiralle previsiblemente, outra proposta xa, a celebrar o vindeiro mes na parroquia de Lanzós.
Así mesmo, dende Vilalba Aberta non quixeron deixar pasar a oportunidade para trasladar o seu “profundo agradecemento ás directivas das asociacións de veciños da parroquia” por permitir facer posible este novo encontro.