Vilalba acollerá a palestra 'Palestina, um conflito. Um povo que resiste'
O Instituto de Estudos Chairegos (Iescha), en colaboración co Concello de Vilalba, organiza a palestra Palestina, um conflito. Um povo que resiste, que estará a cargo de Victorino Pérez Prieto, profesor, escritor, teólogo e pensador. O evento terá lugar o venres 4 de abril, ás 20:00 horas, na Casa da Cultura de Vilalba, e será presentado por Marisa Barreiro.
Victorino Pérez Prieto é un prestixioso ensaísta e investigador cunha longa traxectoria académica e intelectual. Doutor en Filosofía e Teoloxía, foi profesor en diversas universidades de Galicia, España e Latinoamérica. Especialista en cultura galega, con especial atención á Xeración Nós e a Prisciliano, tamén destacou polo seu traballo sobre Raimon Panikkar.
Autor de preto de trinta libros e colaborador en máis de sesenta publicacións, o seu labor abrangue áreas como a teoloxía, a filosofía, a ecoloxía e o pensamento intercultural. Ademais, foi articulista en varios diarios e participou en numerosas revistas tanto galegas como internacionais.
A palestra ofrecerá unha análise profunda sobre o conflito palestino, abordando a resistencia do pobo palestino desde unha perspectiva humanista e crítica. O evento está aberto a toda a cidadanía interesada en reflexionar sobre esta cuestión de actualidade global.