Vilalba acollerá a representación teatral 'Quen ocupa esta cadeira?' a cargo do grupo Os Palimoquiños
O Instituto de Estudos Chairegos, en colaboración co Concello de Vilalba, organizará este sábado 29 de novembro unha nova cita co teatro afeccionado dentro do Circuíto promovido e financiado pola Área de Cultura da Vicepresidencia da Deputación de Lugo. A partir das 12:00 horas, Os Palimoquiños, grupo pertencente á Escola Palimoco Teatro, poñerán en escena a obra Quen ocupa esta cadeira? nos arredores da Casa da Cultura de Vilalba, localización que se trasladará ao interior en caso de climatoloxía adversa.
Os Palimoquiños forman parte da vertente afeccionada de Palimoco, compañía que naceu en 1998 e que deu o salto ao ámbito profesional unha década máis tarde. Este grupo está composto por mozas e mozos de entre 13 e 22 anos que reciben formación teatral continua na Escola Palimoco Teatro, baixo a dirección de Paloma Lugilde. A súa traxectoria destaca pola aposta por un teatro social, inclusivo e de investigación, unha liña de traballo que lles permitiu acadar diversos recoñecementos en certames nacionais e colaborar con entidades como Down Lugo ou Amnistía Internacional.
A obra Quen ocupa esta cadeira?, creada e dirixida por Paloma Lugilde, propón unha experiencia participativa na que o público pode desfrutar de fragmentos de textos clásicos e contemporáneos nun formato dinámico e íntimo. Con elencos que chegan a reunir entre vinte e trinta intérpretes, a peza converteuse nunha proposta habitual en espazos culturais da provincia, onde está a recibir unha excelente acollida entre familias e espectadores de todas as idades.
Con esta actividade, Vilalba reafirma o seu compromiso coa promoción das artes escénicas e coa difusión do talento xuvenil no ámbito teatral.