Vilalba acollerá o domingo unha feira intercultural en Santa María
A alcaldesa de Vilalba, Marta Rouco, e a concelleira de Feiras e Mercados, Paula Vigo, presentaron unha nova proposta para a dinamización dos domingos de feira na Praza de Santa María: unha feira intercultural que se celebrará este domingo 3 de agosto.
“Unha proposta diferente coa que damos continuidade á iniciativa que puxemos en marcha fai uns meses para incrementar a afluencia de visitantes e ambiente na Praza de Santa María durante os domingos de feira”, explicou a alcaldesa de Vilalba.
A cita arrancará ás 12:00 horas e os protagonistas serán os veciños e veciñas de Vilalba emigrados dende diversos países do mundo: Colombia, Venezuela, Marrocos, Perú, Cuba, Brasil, Senegal, Uruguai, Rusia ou Italia, entre outros.
“Quen se encargarán de elaborar produtos típicos dos seus países de orixe coa colaboración económica do Concello para ofrecer aos visitantes e que estes poidan coñecer os sabores do mundo” apuntou a rexedora vilalbesa.
Ademais, cada un dos postos da feira intercultural contará con folletos informativos sobre os países para “fomentar o coñecemento intercultural dos visitantes, ao tempo que promovemos as relacións e conversas entre os nosos veciños e veciñas”, salientou Marta Rouco.
Finalmente, a primeira feira intercultural organizada polo Concello de Vilalba “grazas á colaboración da delegación de Cáritas na nosa vila, que promove cada ano o seu encontro intercultural” contará ás 13:15 horas coa actuación de baile “Alleo” do Colectivo Glovo.
“Dende o Concello queremos animar a todos os visitantes que pasen este domingo pola nosa feira mensual a que se acheguen ata a Praza de Santa María para descubrir sabores do mundo, particularidades de cada cultura e enriquecer a nosa sociedade” concluíu a alcaldesa de Vilalba.