Vilalba acollerá un curso gratuíto do SLG sobre comercialización de produtos agrogandeiros
A localidade de Vilalba será sede os días 2, 11 e 15 de decembro dun curso gratuíto centrado na comercialización e na venda directa de produtos agrogandeiros, como carne, mel ou hortalizas. A iniciativa terá lugar no local do Sindicato Labrego Galego (SLG), situado na rúa do Cuartel 1, en horario de 15:30 a 19:30 horas.
O programa está dirixido a persoas traballadoras, autónomas e desempregadas interesadas en mellorar as súas competencias comerciais e atopar novas vías de venda para os seus produtos. A formación busca ofrecer ferramentas prácticas que permitan optimizar procesos, coñecer mellor o mercado e favorecer un modelo de comercialización máis directo e sustentable.
As inscricións poden realizarse a través do número de teléfono 604 02 65 36 ou dos correos electrónicos vilalba@sindicatolabrego.gal e aprocamlugo@gmail.com. O curso está organizado polo Sindicato Labrego Galego e COAG, coa colaboración de Formación Agroalimentaria e o apoio financeiro do Ministerio de Agricultura, Pesca e Alimentación, que o financia ao cento por cento.