Vilalba convoca para o día 10 de maio a Carreira Escolar das Letras Galegas
![carreira letras galegas portada](https://terrachaxa.com/wp-content/uploads/2024/04/carreira-letras-galegas-portada.jpg)
Xa está aberto o prazo de inscrición para a XIV Carreira Escolar das Letras Galegas, dedicada este ano a Luisa Villalta Gómez.
O prazo está aberto desde o luns para que os e as escolares comecen a anotarse na carreira que se celebrará o vindeiro 10 de maio a partir das 11:00 no estadio municipal da Madalena.
Todos os interesados e interesadas poderán inscribirse ata o vindeiro 25 de abril a través dos seus centros escolares, onde o equipo docente conta coa documentación necesaria para proceder á recollida dos datos dos e as participantes.
Como cada ano, a carreira de carácter participativo, contará con 7 categorías: chupete, biberón, prebenxamín, benxamín, alevín, infantil e cadete; e todo o alumnado participante recibirá o seu correspondente avituallamento e medalla.
Ademais, estará permitido o acceso ao evento das familias do alumnado, para quen estará habilitada a grada pequena do estadio da madalena, quedando a grada principal reservada para alumnado e profesorado.
Así mesmo, os centros educativos contarán cun servizo de autobuses para participar no evento que correrá a cargo do Concello de Vilalba, "co obxectivo de que todos e todas se animen a participar nunha xornada que reúne tres piares básicos da educación: convivencia, deporte e lingua", asegurou a alcaldesa, Marta Rouco.