Haberá un punto violeta na Xira Campestre da Madalena para previr a violencia sexual
A alcaldesa de Vilalba e concelleira de Igualdade, Marta Rouco, anunciou a posta en marcha dun punto violeta na Xira Campestre da Madalena co obxectivo de promover a concienciación e a prevención fronte á violencia sexual durante as festas patronais.
O dispositivo estará operativo o venres 22 de agosto, de 23:00 a 3:00 horas, e o sábado 23 de agosto, de 22:00 a 4:00 horas, situándose nunha das marxes da explanada da Madalena, tal e como xa se fixera en anos anteriores.
O punto será atendido por profesionais especializados en violencia de xénero e violencia sexual, que ofrecerán información e asesoramento a todas as persoas que se acheguen. Ademais de material informativo, repartirase unha serie de agasallos para fomentar a participación e apoiar a mensaxe contra a violencia sexual.
A iniciativa tamén contará cun espazo seguro ao que poderán acudir aquelas persoas que desexen comunicar posibles agresións sexistas, activando o protocolo establecido para este tipo de casos.
A rexedora vilalbesa destacou que “en Vilalba queremos que as nosas festas sexan un espazo seguro para todas e todos. O punto violeta permite que calquera persoa que o precise poida recibir información, apoio e denunciar situacións de acoso ou violencia sexual. É unha ferramenta fundamental para reforzar a prevención e a concienciación na nosa comunidade”.
Rouco subliñou tamén que “este tipo de accións forman parte do compromiso do Concello por garantir unhas festas seguras e inclusivas, fomentando a participación activa da cidadanía na prevención da violencia de xénero e sexual”.