Vilalba pon fin ás festas tras máis de dúas semanas de actividades
Vilalba puxo o broche final ás festas patronais de San Ramón e Santa María tras máis de dúas semanas de celebracións nas que a diversidade da programación logrou manter a participación veciñal a pesar da inestabilidade meteorolóxica. O Concello, que destinou arredor de 200.000 euros á organización, fixo un balance positivo, salientando que os actos chegaron a públicos de todas as idades e gustos.
A alcaldesa, Marta Rouco, subliñou que “a resposta da veciñanza foi excelente e conseguimos que todo o mundo atopara o seu espazo nas festas”, mentres que a concelleira de Cultura, Mónica González, destacou a variedade de propostas, desde as actuacións musicais ata as iniciativas pensadas para o público infantil ou as persoas maiores.
O derradeiro día estivo marcado pola celebración de San Xurxo de Rioaveso, co Día das Parroquias como protagonista. Máis de oitenta veciños fixeron unha ofrenda con produtos caseiros aos patróns, nun xesto de unión que culminou cunha misa solemne e unha sesión vermú prolongada ata ben entrada a tarde. “É moi bonito ver ás parroquias unidas celebrando todas xuntas”, recoñeceu Rouco.
O goberno local xa anunciou que esta mesma semana comezará a preparar as festas de 2026, que se prolongarán ata o 6 de setembro. “Manteremos a idea de ofrecer algo cada día, con propostas variadas para todas as idades”, explicou a rexedora. Entre os eventos máis concorridos deste ano destacou a Xira dos Maiores, que rexistrou un récord de 540 comensais, os días dedicados á infancia, o pregón das irmás Purriños, o concerto de Carlos Baute, a actuación de Xosé Lois e Aliboria, ademais das noites de DJ e o tributo a Joaquín Sabina.
Con este peche, Vilalba consolida un modelo de festas que, malia as dificultades meteorolóxicas, conseguiu encher rúas e prazas, implicando tanto á veciñanza como ao sector hostaleiro e converténdose nun referente no calendario festivo da provincia.