Vilalba rende homenaxe ás Cantareiras este 17 de maio con música na praza da Constitución
Vilalba celebrará este sábado, 17 de maio, unha xornada especial en homenaxe ás cantareiras, no marco da programación do Día das Letras Galegas organizada polo Concello. A concelleira de Promoción da Lingua, María Xosé Fernández, xunto coa edil de Cultura, Mónica González, e o tenente de alcalde Modesto Renda, presentaron os actos previstos para esta data tan sinalada.
A homenaxe terá lugar na praza da Constitución e comezará a partir das 18:30 h coa actuación de diferentes grupos de música tradicional do municipio. Entre eles estarán Mato Vizoso, Ardelle o Eixo, A.C. Lusco e Fusco, Mestura de Nete, Regueifeiras da Chá, Cantareiras do Carabullo, A.C. de Árbol, Buxos Verdes, A.C. Andrade e Lambe Lambe.
O colofón da xornada chegará ás 21:00 horas co concerto do grupo Tanto Nos Ten, que porá o broche musical a unha tarde de celebración da cultura, da música e da lingua galega.
A iniciativa busca poñer en valor o legado das mulleres que transmitiron a tradición oral e musical, contribuíndo á preservación da identidade galega.