Vilalba volve participar na campaña 'Concellos en Negro'
O Concello de Vilalba volve a participar neste 2017 na campaña Concellos en Negro - Vilalba en Negro xunto a outros 56 municipios galegos, así como as Deputacións de A Coruña, Lugo e Pontevedra.
A campaña, que terá lugar os días 24, 25 e 26 de novembro, pretende vestir de negro as nosas vilas en repulsa contra os asesinatos machistas. Pero, nesta edición, quere ir máis lonxe se cabe e, ademais de implicar a establecementos comerciais e hostaleiros que na campaña do 2016 chegaron a ser 300 os participantes en Vilalba, quere chegar tamén á propia cidadanía, para que amosen a súa repulsa contra a violencia de xénero e os asesinatos machistas vestindo de negro as ventás das súas propias vivendas.
Esta actuación de sensibilización en pro da igualdade e contra a violencia de xénero é unha das actuacións do Centro de Información á Muller (CIM).
Os Concellos e Deputacións participantes asinarán un Protocolo de Colaboración o vindeiro 15 de novembro en Santiago de Compostela e realizarase un acto conxunto de todas as entidades participantes ás doce do mediodía do 24 de novembro de 2017.