Vilapedre acolle o 23 un curso sobre o solo pélvico
A casa escola de Vilapedre acolle o día 23, sábado un curso sobre o solo pélvico, que é e como recuperalo.
Neste curso, de tres horas de duración, explicaranse as principais disfuncións do solo pélvico como as perdas de urina, a constipación, a dor durante as relacións sexuais e outros problemas.
Comentaranse os aspectos psicolóxicos que poden influír na evolución correcta dun tratamento de rehabilitación.
E aprenderase a identificar os principais principios e técnicas de fisioterapia que se aplican na rehabilitación.
Esta xornada, que dará comezo ás 17.00 horas, estará impartida por Mariña Amor, fisioterapeuta e especialista neste tema.
A actividade está organizada pola asociación veciñal e o prezo é de 5 euros para socios e o dobre para o resto.