Volven pechar os baños do aparcadoiro subterráneo polos actos vandálicos
O Concello vese obrigado a pechar de novo os aseos públicos do aparcadoiro subterráneo de Vilalba debido aos actos vandálicos rexistrados durante a fin de semana. As instalacións apareceron con danos significativos, incluíndo as portas de acceso forzadas e os elementos interiores completamente destruídos.
Este novo incidente prodúcese apenas un mes despois da última reparación, que se sumou ás 15 intervencións de fontanería e arranxos de albanelería realizadas polo persoal municipal nos últimos tempos. O custo total destinado ao mantemento e reposición dos elementos afectados ascende xa a uns 5.000 euros.
Dende o Concello, condenan firmemente estes actos vandálicos e lamentan que un espazo público, pensado para o uso e beneficio de todos os veciños e veciñas, teña que permanecer pechado debido a este tipo de comportamentos incívicos.