Xa hai gañadores do concurso de recitado de poemas na casa museo de Manuel María
![concurso recitado poemas casa manuel maria2](https://terrachaxa.com/wp-content/uploads/2023/03/concurso-recitado-poemas-casa-manuel-maria2.jpg)
A Casa-Museo Manuel María celebrou este sábado a sétima edición do Concurso escolar de recitado poético da obra de Rosalía de Castro e Manuel María con alumnado de distintos lugares de Galiza.
O certame, que leva por título Rosalía sempre viva, desenvolveuse en dúas sesións, de mañá e de tarde, e contou cunha importante participación. O alumnado participante, de entre os 6 e os 18 anos, realizou un excelente concurso cun nivel altísimo que puxo moi complicado o veredito do xurado.
Os premiados na primeira categoría (1º, 2º e 3º de primaria) foron Dunia Sánchez Costa, do CEIP Canosa-Rus de Coristanco, polo recitado do poema Caracol de Manuel María. Na segunda categoría (4º, 5º e 6º de primaria) foi para Paula García Vázquez, do CEIP Península da Paz de Cervo, co poema O cuco.
Na 3ª categoría (Educación Secundaria) gañou Carme Pereira Troncoso, do Colexio Maristas A Inmaculada de Lugo, polo recitado do poema Tristes recordos de Rosalía de Castro; e na 4ª categoría (Bacharelato e Ciclos Formativos) o premio foi para Lucía López Alvariño do IES Santiago Basanta Silva, polo recitado do poema Eu ben vin estar o moucho de Rosalía de Castro.
Tamén recibiron unha mención honorífica Lara Arias Sanjurjo do CPI de Xanceda polo poema de Manuel María A natureza, na categoría segunda e, por outra parte, Sara Martínez Quindimil do CPI de Xanceda polo recitado do poema Cando a luniña aparece.
A Casa-Museo Manuel María agradeceu a todos os presentes, alumnado finalista, familias e profesorado acompañante e público en xeral, a súa total colaboración para que a xornada de convivio decorrese con suceso.