Sociedade

O concurso recoñeceu tanto a persoas empadroadas no municipio como a participantes procedentes doutros lugares

O Concello de Xermade deu a coñecer os gañadores e gañadoras dos Premios do Entroido 2026, un certame que volveu destacar pola elevada participación e pola creatividade dos disfraces presentados en todas as categorías. O concurso recoñeceu tanto a persoas empadroadas no municipio como a participantes procedentes doutros lugares, consolidándose como unha cita festiva de referencia na comarca.

Na categoría infantil de persoas empadroadas, o primeiro premio, dotado con 70 euros, foi para Guardia Real de Xermade, de Patricia Pico Roca. O segundo premio, de 50 euros, recaeu en O dúo insoportable, de Verónica Salgado Prieto, mentres que o terceiro, con 25 euros, foi para O allien do Reguengo, de Silvia Prieto Ardao.

Na modalidade individual ou parella de persoas empadroadas, o primeiro premio, de 100 euros, foi para Los guardianes del bosque, de Marina Pilar Trastoy Vérez. O segundo premio quedou deserto e o terceiro, con 50 euros, foi para Na mesa argalleira, presentado por María Elena Eimil Codesal.

Na categoría de grupos empadroados, o primeiro premio, dotado con 200 euros, foi para Choros e risas, de María José Novás Ferreiro. O segundo premio, de 150 euros, recaeu en Xabaríns de palabra curta, de Paula Campello Castro, e o terceiro, con 100 euros, foi para Pico ou bico?, de Jennifer Caaveiro Pena.

Entre os participantes non empadroados, o primeiro premio, de 150 euros, foi para Funkofest, da Asociación Cultural e Deportiva de Árbol. O segundo premio, de 100 euros, foi para Expediente Terra Chá, de Vanesa Teijeiro Camba, e o terceiro, con 50 euros, para A fábrica de chocolate, de Lucía Carballido Trastoy.

O xurado concedeu ademais o Premio Especial á Orixinalidade, dotado con 80 euros, ao disfrace El Bioshock, de Félix Feijóo Trigo. Así mesmo, na categoría individual ou parella declarada deserta, outorgouse un premio de 75 euros a Xaque á intolerancia na Chaira, presentado pola Asociación Familiar do Entroido Chairego.

Desde o Concello de Xermade trasladáronse parabéns a todas as persoas participantes, destacando o alto nivel das propostas e o espírito festivo e creativo que volveu encher o municipio durante a celebración do Entroido.